CRAOBHAN GU DEÒ
Pròiseact suaicheanta ath-fhiadhachaidh, ag ath-cheangal dhaoine ri nàdar agus a’ cruthachadh obraichean uaine.
Tha feum aig Alba, an RA agus an t-saoghal mhòr air àite far an gabh ath-fhiadhachadh a rannsachadh, a ghabhail os làimh agus a roinn. Sin an t-adhbhar gu bheil sinn airson a’ chiad Àrainn Ath-fhiadhachaidh san t-saoghal a chruthachadh ann Dul Dreagain.Laurelin Chuimeanach-Fhriseal, Àrainn Ath-fhiadhachaidh, Dùl Dreagain
Ath-fhiadhachadh na Gàidhealtachd
Airson còrr air 25 bliadhna, tha am buidheann carthannais Trees for Life (Craobhan gu Deò) air a bhith ag obair gus a’ Ghàidhealtachd ath-fhiadhachadh.
Tha an carthannas ag ath-stèidheachadh na coille Chailleannaich ann an Gleann Afraig agus oighreachd Dhùl Dreagain de 10,000 acair ann an Gleann Moireastain, far a bheil iad a’ fàs nam mìltean de chraobhan dùthchasach bho shìol gach bliadhna. Ag obair còmhla ri uachdarain agus coimhearsnachdan ionadail, tha Craobhan gu Deò a’ meudachadh na h-obrach seo còmhla ri iomairt ùr na Gàidhealtachd ann an Gleann Afraig.
An ath-bhliadhna, bidh Craobhan gu Deò a’ fosgladh a’ chiad Àrainn Ath-Fhiadhachaidh air an t-saoghal aig Dùl Dreagain, far a bheil ath-fhiadhachadh air a bhith a’ gabhail àite bho 2008. Bidh an t-ionad dualchais nàdarra ioma-mhilleanan seo na bhealach gu cruth-tìre fhiadhaich na h-oighreachd, a’ ceadachadh do luchd-tadhail eòlas a chur air ath-fhiadhachadh ann an gnìomh, slighean is frith-rathaidean ruigsinneach a rùrach agus barrachd ionnsachadh mu fhiadh-bheatha, cultar agus dualchas ionadail. Bidh an t-ionad cuideachd a’ tabhann cafaidh, clasruman agus àite airson raon farsaing de thachartasan, ghnìomhachdan agus eòlasan uile-tharraingeach.
MAOINEACHADH OBRAICHEAN UAINE AIRSON ÀRAINN ATH-FHIADHACHAIDH DHÙL DREAGAIN
Tha Maoin Obraichean Uaine HIE air £234,554 a bhuileachadh a dh’ionnsaigh chosgaisean calpa a tha an lùib togalach an ionaid a stèidheachadh agus na h-obraichean eile co-cheangailte ris.
Bidh an t-ionad a’ tabhann eòlasan cleasachail agus foghlaim do dhaoine de gach aois agus dualchas gus tlachd a ghabhail às a’ chruth-tìre nàdarra. Thathar a’ sùileachadh gun cruthaich an t-ionad suas ri 20 obair ùr uaine dùthchail co-ionann ri làn-ùine, a thuilleadh air na 8.7 a tha mar-thà aig Dùl Dreagain.
Bidh taisbeanaidhean agus eadar-mhìneachadh san Ionad ann am Beurla agus Gàidhlig, a’ gabhail stiùir bhrosnachail bho dhualchas shaidhbhear na coimhearsnachd ionadail agus na Gàidhealtachd san fharsaingeachd.
A thuilleadh air a bhith na àite a bheir tlachd do dhaoine, tha am pròiseact a’ cur gu cudromach ri eaconamaidh càrboin nas ìsle, bith-iomadachd leasaichte agus a’ lìbhrigeadh bhuannachdan do na coimhearsnachdan ionadail, a’ gabhail a-steach obraichean.Carroll Buxton, Iar-Àrd-Oifigear, HIE
BUAIDHEAN ATH-FHIADHACHAIDH NAS FHARSAINGE
Thar còrr air fichead bliadhna, tha Craobhan gu Deò air a bhith ag obair a dh’ionnsaigh ùr-ghnàthachadh a tharraing gu glèidhteachas. Faigh a-mach tuilleadh mu ath-fhiadhachadh aig Dùl Dreagain; mar a tha iad ag obair còmhla ri buidhnean eile agus leis a’ choimhearsnachd fharsaing; agus na sgilean dèanadach a tha saor-thoilich agus luchd-obrach a’ cosnadh ann an raointean mar àrach tuathanas-gàrraidh, stiùireachd air fèidh, cumail suas oighreachd agus mòran eile.
Can we help you?
Find out more about who we work with and how we can help.
