Taigh-staile Bheinn na Faoghla

Blasad Baoghlach: Taigh-staile ùr mac na braiche

Read in English

Thàinig aisling eileanach a thaobh mac na braiche a chruthachadh ann an Innse Gall, gu bith ann an 2024 leis a’ chiad bhoinneig de spiorad a’ tòiseachadh air sruthadh ann an Taigh-staile Bheinn na Faoghla. 

Ath-bheòthachadh Traidisean

Tha saothrachadh ann an Taigh-staile Bheinn na Faoghla a’ comharrachadh ath-bheòthachadh air reasabaidh a tha 130 bliadhna a dh’aois.  Dh’fhastaidh an neach-stèidheachaidh Aonghas Mac a’ Mhaoilein seirbheisean an àrd-ghrùdair, Brèanann McCarron, agus thug iad an taigh-staile gu ìre ann an togalach giollachd bhradain a bha air a dhol a-mach à cleachdadh ann an ceann a tuath Bheinn na Faoghla.   

Bha e air a dhèanamh sònraichte leis an leudachadh ann an stoidhle taigh-solais glainne, a tha na dhachaigh do phoit-dhubh chopair.
B’ e a’ chompanaidh ionadail, Na Bràithrean Mac an Aonghais, am prìomh chunnradair togail agus fhuaireadh an t-uidheam grùdaidh anns a’ Ghàidhealtachd ’s  na h-Eileanan.  

Tha an taigh-staile a’ cleachdadh eòrna a tha air fhàs air croit Aonghais agus air tuathanasan faisg air làimh, a tha air a thodharachadh le feamainn bhon chladach. Tha mòine agus fraoch às an sgìre bunaiteach don phròiseas giollachd.

Tha Taigh-staile Bheinn na Faoghla a’ coimhead ri timcheall air 350,000 liotar de dh’uisge-beatha a thoirt gu buil gach bliadhna, a’ cleachdadh thogsaidean bourbon agus searaidh airson a thoirt gu ìre.  Tha an taigh-staile a’ planadh cuideachd air sineubhar agus ruma a dhèanamh.

Buaidh Coimhearsnachd

Tha obraichean sgileil agus air an deagh phàigheadh do dhaoine sa choimhearsnachd air an cruthachadh mar-thà san taigh-staile agus thathar an dùil gum bi an sgioba-obrach a’ sìor-fhàs gu timcheall air 25.  

Thuirt Aonghas: “Chan eil àite ann a tha buileach coltach ri Beinn na Faoghla agus tha sinn moiteil a bhith comasach air pàirt a ghabhail ann an cumail suas an eilein, a’ cruthachadh obraichean ùra is sgileil agus a’ toirt mac na braiche a tha a’ glacadh brìgh an àite gun choimeas seo, gu buil.”

Teisteasan uaine

Tha am pròiseas dealbhaidh agus grùdaidh a’ gabhail a-steach theicneòlasan tùsail càrboin ìosal.  

Thuirt Aonghas: “Tha sinn air leth toilichte leis an taic a tha sinn air fhaighinn bho HIE.  Tha lorg càrboin ìosal a bhith againn bunaiteach don taigh-staile seo; tha sinn air pròiseas toraidh spioraid a dhealbhadh a tha air a chumhachdachadh le tùsan cumhachd ath-nuadhachail. Ìslichidh seo mach-chur càrboin an taigh-staile, a’ dèanamh cinnteach gu bheil sinn aig fìor aghaidh gluasad gnìomhachais an uisge-bheatha air falbh bho chleachdadh air connaidhean fosail.”

Thug HIE taic de £2.8m don phròiseact, a’ daingneachadh a dhealais a thaobh leasachadh agus ùr-ghnàthachadh roinneil.

Cruthachadh obraichean ionadail agus a’ tàladh dhaoine gu tilleadh do na h-eileanan.

Dh’fhàg Màiri Mairead Connarty, aon de na buill obrach as ùire san taigh-staile, Innse Gall aig 18 bliadhna a dh’aois gus a dhol don oilthigh. An deidh PhD ann an ceimigeachd a chosnadh, lorg i i fhèin ag obair ann an Taigh-staile Bhreatainn a Tuath airson suas ri 18 bliadhna, air a fastadh an toiseach mar cheimigear agus às dèidh sin mar mhanaidsear an obair-lainn san taigh-staile gràin seo thar nan sia bliadhna mu dheireadh.

Cha b’ e ruith ach leum nuair a chaidh obair a thairgsinn dhi mar mhanaidsear. Tha i a-nis a’ gabhail mòr-thlachd às a’ chothrom gun dùil a fhuair i air a dithis mhac òg a thogail san àite far an do chuir i seachad a h-òige, an dèidh tilleadh a Bheinn na Faoghla a thòiseachadh na dreuchd ùr anns an taigh-staile san Lùnastal 2024.  
 
Thuirt Màiri Mairead: “Bha mi a-riamh airson tilleadh agus tha gràdh mòr aig mo chèile, a tha bho thìr-mòr, air an eilean cuideachd. Tha e mìorbhaileach gu bheil an taigh-staile a’ cruthachadh chothroman ùra. Tha sgioba iongantach an seo mar-thà agus tha e a’ còrdadh rium a bhith ag obair còmhla riutha agus sinn a’ leantainn oirnn a’ togail a’ ghnothachais ùir bhrosnachail seo. Tha sinn fìor thoilichte gum bi ar cuid chloinne comasach air tlachd fhaighinn à òige ann am Beinn na Faoghla agus foghlam Gàidhlig, mar a fhuair mise.”